Presidentja Gordana Siljanovska Davkova me rastin e Ditës Ndërkombëtare të Arsimit e mirëpriti Ile Mihajllovskin, arsimtarin klasor në SHNK “Shën. Kirili dhe Metodij” në Sveti Nikole.
Mihajllovski është përzgjedhur midis 50 finalistëve prej 5.000 arsimtarëve të nominuar nga 89 shtete në botë për Çmimin prestigjioz global për mësimdhënësit për vitin 2025, të cilin e jep Fondacioni Varki nga Londra, me mbështetje nga UNESKO-ja dhe kompania GEMS Education.
Mësuesi e njohu Presidenten Siljanovska Davkova me procedurat e aplikimit dhe përzgjedhjes së tij, si dhe me punën dhe rolin e tij prej tre dekadash brenda dhe jashtë shkollës, nëpërmjet zhvillimit të mësimdhënies të përshtatur për nxënësit me aftësi të kufizuara, mbështetjes për fëmijët në rrezik social, pa përkujdesje prindërore dhe në familje kujdestare.
Duke e përgëzuar Mihajlovskin, Presidentja Siljanovska Davkova vlerësoi se përzgjedhja në mesin e 50 finalistëve paraqet një mirënjohje dhe legjitimitet të madh për punën e tij të vazhdueshme, aplikimin e metodave inovative dhe sukseset e rëndësishme të arritura në procesin arsimor.
Ajo e përgëzoi për punën e përgjithshme humanitare të Mihajllovskit, duke përfshirë edhe mbështetjen e procesit arsimor të fëmijëve pacientë onkologjikë, si dhe përkushtimin e tij për mbrojtjen e mjedisit nëpërmjet realizimit të një sërë projektesh së bashku me nxënësit.
Presidentja shprehu pritjen që Mihajlovski me investimin e gjithanshëm në këtë profesion, me vizionin e tij për ndikim pozitiv në mjedis, do të vazhdojë të jetë shembull dhe frymëzim për çdo individ.
Bashkëbiseduesit shkëmbyen mendime edhe për gjendjet dhe sfidat në arsimin nëntëvjeçar, si dhe për mundësitë për vlerësimin e kuadrit mësimor.
