Новинарско прашање: Што ќе им порачате на граѓаните на големиот христијански празник?
Претседателката Сиљановска-Давкова: Денеска, кога постојано слушаме „Христос се роди навистина се роди“, тоа не е само обична изјава, туку тоа е едно длабоко потсетување за себе, за најблиските, за државата, за христијаните, дека оваа изјава има длабока тежина и големо значење. Значи дека треба да се потсетиме на она што го означува. А, означува: спремност, способност и желба, човечкото во себе да го разбудиме, а човечкото е секогаш врзано за светлина, за добрина, за надеж, или ако можеби уште подобро може да се објасни – божественото во нас да го разбудиме. И затоа секоја година, како што и архиепископот рече, ние на овој ден фрламе еден поглед кон себе, се оценуваме и се прашуваме дали навистина се однесуваме со верба и со вера во доброто, во убавото, или ако сакате во светлото. Затоа е тоа голем ден и се чини дека зборовите на архиепископот, дека во ова време-невреме, дури и кога нешто не гледаме, треба да веруваме во него, а тоа е повторно доброто, светлото, надежта дека човекот во нас постои, дека еве денеска се потсетуваме на Богочовекот, на Исус Христос, којшто не е само денеска меѓу нас, туку е постојано меѓу нас, за да не потсети за тоа дека неговиот пат е нашиот вистински пат. Гледате колку народ одеднаш се обединува, гледате каква позитивна енергија и мисла има. Јас не видов денеска намуртен човек, сите се насмеани и сите си ветуваат сами себеси дека од денеска па натаму ќе бидат уште подобри, ќе го гледаат кај другиот најдоброто, ќе го потикнуваат кај другиот доброто, ќе трагаат по светлината, односно, ќе трагаат по Бога во себе.
Новинарско прашање: Јас имам едно прашање. Кај кого се падна вчера паричката?
Претседателката Сиљановска-Давкова: Паричката се падна кај мојата внука. Да, не знам да кажам дали тоа беше случајно, се разбира, на едно дете му треба да верува дека животот е пред него, дека доброто вреди да се учи, се учи, љубовта се учи, доброто се учи, учиме ние да станеме добри луѓе и мислам дека немаше посреќно дете од неа. Се разбира, незината радост, како и денеска нашата радост, овде со дечињата ангелчиња е немерлива.
Новинарско прашање: Да е жива и здрава.
Претседателката Сиљановска-Давкова: Ви благодарам многу. И вие и вашите најблиски да бидат живи и здрави, среќни празници на сите. Ви благодарам за вниманието, мислам дека и вашата улога денеска е неверојатна, дека сте вие таа врска понекогаш меѓу нас и она што треба да го правиме, ако сакате, во добрата мисла, во добрите дела, во потрагата по светлината. Ви благодарам.
