Presidenti Stevo Pendarovski, në suazat e pjesëmarrjes në Takimin vjetor të Forumit ekonomik botëror në Davos, sot mbajti fjalim në sesionin në panel “Ruajtja e sigurisë në Evropë”.
Pjesëmarrës në këtë debat ishin sekretari i përgjithshëm i NATO-s, Jens Stoltenberg, kryeministri i Belgjikës, Aleksandar de Kro, ministrja e mbrojtjes e Holandës, Kajsa Olongren, si dhe shefi i administratës presidenciale në Ukrainë, Andrij Jermak dhe gazetarja Frensin Lavka, redaktore në Blumberg.
Në fokusin e diskutimit ishte lufta në Ukrainë, si dhe kërcënimi i përbashkët që e rrëzoi rendin e sigurisë i cili me dekada me radhë e ndihmoi Evropën të përparojë paqen, por edhe hapat që duhet t’i ndërmarrë Bashkimi Evropian në kontekstin e ndryshuar radikalisht.
Pjesëmarrësit këtë panel e dënuan agresionin rus dhe shprehën mbështetje për popullin ukrainas. Ata folën edhe mbi rëndësinë e parandalimit të eskalimit të konfliktit në Ukrainë dhe mbi domosdoshmërinë që të sigurohet mbrojtje e aleatëve të NATO-s.
Presidenti Pendarovski theksoi se invazioni rus mbi Ukrainën si kurrë më parë e imponoi nevojën që Bashkimi Evropian të fokusohet në integrimin e vendeve të Ballkanit Perëndimor, proces i cili do ta përforcojë mandej stabilitetin, sigurinë, demokratizimin e rajonit tonë, kurse kështu do të kontribuojë edhe në sigurinë e tërësishme të kontinentit.
Theksoi se NATO-ja, por edhe Bashkimi Evropian, janë dy korridoret për të ardhme më të mirë, më të sigurt dhe më me prosperitet.
“Nevojitet ta ndihmojmë Ukrainën, t’i bindim edhe aleatët e tjerë të cilët mund të kenë një dozë skepticizmi. Politika e “dyerve të hapura” nuk duhet të vlejë vetëm për NATO-n, por të zbatohet edhe për Bashkimin Evropian, dyert e të dy organizatave të mbeten të hapura për popullin ukrainas. Ukrainasit po luftojnë për lirinë e vet, por kjo luftë është edhe për mbrojtjen e vlerave demokratike. Kjo është luftë e një autokracie kundër demokracisë. Nëse Putini arrin ta fitojë në ndonjë mënyrë këtë luftë, atëherë nuk do ta mundë vetëm Ukrainën”, duke shtuar se Maqedonia e Veriut në suazat e mundësive të veta i jep mbështetje Ukrainës, nga ndihma ushtarake deri te ndihma diplomatike dhe politika e dyerve t[ë hapura duhet të vazhdojë, jo vetëm në lidhje me NATO-n por edhe në raport me Bashkimin Evropian.
“Politika e dyerve të hapura nuk duhet të vlejë vetëm për Aleancën e NATO-s, por edhe për Bashkimin Evropian. Në të kundërt, koncepti i Evropës së bashkuar, në paqe me veten dhe me botën nga Atlantiku deri në Ural, do të jetë vetëm ëndërr”, tha Presidenti Pendarovski.
