Presidenti Stevo Pendarovski sot mori pjesë në takimin e liderëve të organizuar nga Qendra Beogradase për Politikë të Sigurisë, të titulluar “Agresioni rus mbi Ukrainën: moment i ri për zgjerim të BE-së?”
Presidenti referoi mbi rëndësinë e anëtarësimit në NATO dhe ndikimin e propagandës ruse të Ballkanit.
“Nëse ne nuk ishim në NATO nuk do t’i shkëmbenim të gjitha informacionet në atë sistem, nuk do të kishim mundësi të ballafaqohemi me të gjitha propagandat e tjera dhe lajmet e rrema. Nëse e krahasojmë penetrimin e shërbimeve ruse në rajon, sidomos në Maqedoni, tani kjo nuk është kaq e madhe në krahasim me vitin 2018, kur e organizuam referendumin për anëtarësim në NATO, dhe sidomos para asaj fushate, kur entitete të huaja vendosen 35 portale në internet brenda natës në vend, prej të cilave 2/3 kishin emra të ngjashëm me portale që ekzistonin më parë”, tha Presidenti në këtë diskutim.
Në lidhje me kontekstin bilateral me Bullgarinë, si pengesë në integrimet maqedonase ndaj BE-së, Presidenti Pendarovski deklaroi se para dy vjet e gjysmë Bullgaria filloi të ketë kërkesa të cilat nuk kanë asnjë pikë takimi me kriteret e BE-së. “Filluan të flasin për identitetin etnik maqedonas, se gjuha maqedonase është dialekt i gjuhës bullgare, se në periudhën nga viti 1941 deri në vitin 1944 ata kanë qenë administratorë, ndërsa jo okupatorë dhe e gjithë kjo u është shpërndarë me shkrim të gjithë ambasadorëve. Një lloj i tillë revizionizmi historik është absolutisht i palejueshëm në çdo diskutim serioz”, tha Presidenti Pendarovski duke shtuar se dialogu i tillë nuk i shkon një vendi që është anëtar i BE-së.
Në diskutim morën pjesë Sllavica Gërkovska, zëvendëse e kryeministrit të Qeverisë e obliguar për politika për sundim të mirë, Igor Bandoviq, drejtori i Qendrës Beogradase për Politikë të Sigurisë, Vesella Çerneva, zëvendësdrejtoreshë e Këshillit Evropian për Marrëdhënie të Jashtme, Goran Bulldioski, drejtori i programit për Evropën dhe Azinë Qendrore i Fondit për Shoqëri të Hapur dhe Sërgjan Cvijiq, kryetar i Komitetit Ndërkombëtar Këshillëdhënës i Qendrës Beogradase për Politikë të Sigurisë.
Qëllimi i takimeve të liderëve është që të diskutohet mbi sfida të rëndësishme të jashtme dhe të sigurisë me të cilat ballafaqohet rajoni, mbi evenimentet gjeopolitike dhe trendet që i tangojnë, si dhe të vlerësohet e ardhmja e reformave demokratike, bashkëpunimi rajonal dhe vendi i Ballkanit Perëndimor në politikën globale.
