Presidenti Stevo Pendarovski sot e mirëpriti ministren e Punëve të Jashtme të Rumanisë, Luminica Odobesku, e cila është në vizitë pune në shtetin tonë.
Bashkëbiseduesit e takimit diskutuan mbi gjendjet aktuale lidhur me aspiratat evropiane të shtetit tonë dhe rrjedhën e procesit të skriningut. Duke e falënderuar për mbështetjen që e jep Rumania për realizimin e objektivave strategjike të shtetit tonë, Presidenti Pendarovski vuri në dukje nevojën për përparimin e procesit të integrimit të vendeve të Ballkanit Perëndimor në Bashkimin Evropian, në funksion të stabilitetit, sigurisë, zhvillimit demokratik dhe prosperitetit të rajonit.
Njëkohësisht, Presidenti Pendarovski e përshëndeti nënshkrimin e planit aksional të bashkëpunimit midis dy ministrive të punëve të jashtme në dy vitet e ardhshme dhe të Protokollit për bashkëpunim në fushën e arsimit, që do të kontribuojnë për përparimin e mëtejshëm të bashkëpunimit bilateral midis Maqedonisë së Veriut dhe Rumanisë.
Ministrja Odobesku dhe Presidenti Pendarovski biseduan edhe mbi marrëdhëniet e përgjithshme bilaterale midis dy shteteve, bashkëpunimin në suazat e aleancës së NATO-s dhe të OSBE-së, si dhe mbi gjendjet në rajonin më të gjerë, duke përfshirë ngjarjet në Ukrainë dhe në Lindjen e Mesme.
