Gordana Siljanovska Davkova priti sot në takim Fatma Meriç Yilmaz, Kryetare e Gjysmëhënës së Kuqe Turke dhe anëtare e Këshillit të Presidentit të Republikës së Turqisë, e shoqëruar nga Presidentja e Kryqit të Kuq të Maqedonisë, Liljana Ristevska.
Presidentja Siljanovska Davkova vlerësoi bashkëpunimin e suksesshëm midis Kryqit të Kuq dhe Gjysmëhënës së Kuqe Turke, të vendosur në vitin 1995, si një faktor të fortë në krijimin e marrëdhënieve miqësore maqedono-turke.
Sipas saj, sfidat gjithnjë e më komplekse humanitare imponojnë nevojën për solidaritet më të madh ndërkombëtar, ndihmë të koordinuar dhe një kalim nga veprimi reaktiv në atë parandalues.
Ajo theksoi se forcimi i bashkëpunimit rajonal humanitar, si dhe ndarja e njohurive, përvojave dhe praktikave të mira, çojnë në përgjigje më efikase, në kohë dhe të përshtatshme ndaj krizave.
Presidentja Siljanovska Davkova përshëndeti zgjerimin e projekteve ekzistuese dhe fillimin e projekteve të reja të përbashkëta midis dy organizatave kombëtare, që synojnë ndihmën e kategorive të cenueshme në kohë lufte, por edhe në kushte paqeje.
Fatma Meric Yilmaz informoi për rolin e Gjysmëhënës së Kuqe Turke dhe rrjetin e saj ndërkombëtar, si dhe për bashkëpunimin e frytshëm me Kryqin e Kuq të Maqedonisë përmes programeve, donacioneve dhe trajnimeve të shumta.
Ajo theksoi se fokusi i aktiviteteve të tyre humanitare aktualisht është mbi personat mbi moshën 65 vjeçare, si kategoria më e lënë pas dore e qytetarëve.
Gjithashtu, kryetarja Yilmaz kujtoi ndihmën vetëmohuese turke për qytetarët e Shkupit, pas tërmetit katastrofik të vitit 1963, por edhe ndihmën reciproke maqedonase për qytetarët turq pas tërmetit katastrofik në Turqi në vitin 2023. “U ndërtua një shkollë e re, e cila sot mban emrin “Maqedoni” – shtoi ajo.
Ajo i dhuroi Presidentes Siljanovska Davkova të dhëna arkivore dhe fotografi historike, të cilat dokumentojnë ndihmën e ofruar nga Gjysmëhëna e Kuqe Turke gjatë tërmetit të Shkupit të vitit 1963.
