Presidentja Gordana Siljanovska Davkova sot e mirëpriti në takim lamtumire ambasadorin e Kanadasë, Xhajls Norman.
Në këtë takim Presidentja shprehu mirënjohjen e saj për angazhimin dhe kontributin e përgjithshëm personal të ambasadorit Norman në përparimin e marrëdhënieve dhe bashkëpunimit ndërmjet dy vendeve dhe i uroi atij suksese të mëtejshme personale dhe profesionale.
Në këtë bisedë u shpreh kënaqësia për marrëdhëniet e shkëlqyera maqedonase-kanadeze dhe u theksua interesi për përforcimin dhe dinamizimin e mëtejmë të dialogut politik nëpërmjet shkëmbimit të vizitave në të gjitha nivelet, si dhe intensifikimit të bashkëpunimit të përgjithshëm ndërmjet dy shteteve mike, veçanërisht në fushën e ekonomisë.
Duke vënë në dukje se Deklarata për bashkëpunim dhe partneritet strategjik paraqet bazë solide për zhvillimin e mëtejshëm të bashkëpunimit ndërmjet dy vendeve, Presidentja e rikonfirmoi angazhimin tonë për ruajtjen e rendit ndërkombëtar, promovimin e demokracisë, shoqërisë qytetare dhe të drejtave të njeriut, në interes të sigurisë dhe prosperitetit ekonomik të shtetit.
Në bisedë Presidentja shprehu mirënjohjen për partneritetin e fortë dhe funksional midis dy vendeve në kuadër të Aleancës së NATO-s, si dhe për mbështetjen e vazhdueshme të Kanadasë për reformat politike, ekonomike dhe të sigurisë në rrugën drejt anëtarësimit të plotë në Bashkimin Evropian.
Bashkëfolësit e përshëndetën bashkëpunimin në nivel multilateral, sidomos në suazat e Kombeve të Bashkuara, si dhe në Organizatën Ndërkombëtare të Frankofonisë, si dhe rolin e rëndësishëm të diasporës së shumtë dhe të organizuar mirë maqedonase në Kanada në përforcimin lidhjeve të përgjithshme midis dy vendeve.
