Presidentja Gordana Siljanovska Davkova sot në Vilën Biljana në Ohër i mirëpriti Meto Kolloskin dhe Gordan Jordanovin nga Diaspora e Bashkuar Maqedonase.
Në takim, Presidentja u informua mbi projektet aktuale dhe aktivitetet e planifikuara të DBM-së dhe u shkëmbyen mendime mbi Strategjinë Kombëtare për Bashkëpunim me Diasporën, për situatën aktuale politike në SHBA dhe Evropë, si dhe për ndryshimet në demografinë e diasporës.
Duke theksuar se DBM-ja e përfaqëson zërin global të mërgimtarëve maqedonas në SHBA, Kanada, Evropë dhe Australi, Presidentja shprehu përkrahje për iniciativat e saj dhe kontributin e përgjithshëm për afirmimin ndërkombëtar të vendit dhe promovimin e vlerave, identitetit dhe kulturës maqedonase.
Në këtë drejtim, ajo e falënderoi DBM-në për konstruktivitetin e saj, mbështetjen në përfaqësimin e interesave maqedonase dhe përmbushjen e qëllimeve strategjike të shtetit, si dhe për rolin e tyre në përparimin e marrëdhënieve bilaterale me vendet në të cilat veprojnë.
Në këtë takim Presidentja e theksoi përkushtimin e saj për nxitjen e bashkëpunimit me DBM-në, thellimin e lidhjeve me mërgimtarët, shfrytëzimin e potencialeve dhe përforcimin e rolit të tyre në zhvillimin dhe prosperitetin e vendit.
Duke theksuar se diaspora maqedonase është shtyllë e atdheut, resurs diplomatik dhe se gjendja jonë ekonomike lidhet drejtpërdrejt me aktivitetet e diasporës, Presidentja Siljanovska Davkova tha se është i domosdoshëm bashkëpunimi aktiv dhe produktiv me mërgimtarët maqedonas, si dhe se gjetja e modelit dhe kushteve të veçanta me të cilat do të mundësohen investimet e tyre, si dhe transferimi i njohurive dhe aftësive në vend.
