Bashkëshortja e Presidentit, Elizabeta Gjorgievska së bashku me Doris Shmidauer, bashkëshortja e Presidentit federal të Republikës së Austrisë, Aleksander Van der Belen që po qëndrojnë në vizitë zyrtare në Republikën e Maqedonisë së Veriut, sot në Zyrën e Presidentit, TëRinjtëHab patën mundësi të njihen me projektin për ndërtimin e shkathtësive për punësim, kompetencave dhe mundësive për rrjetëzim të të rinjve që realizohet nga Këshilli nacional rinor i Maqedonisë së Veriut pas së cilit e ndoqën edhe ekspozitën e punimeve të grave sipërmarrëse të organizuar në bashkëpunim me Qendrën për menaxhim me ndryshimet.
Znj. Gjorgievska dhe znj. Shmidauer e vizituan Çarshinë e vjetër të Shkupit ndërsa gjatë vizitës kishin mundësi të bisedojnë me një pjesë të artizanëve. Në Galerinë nacionale Çifte hamam, znj. Gjorgievska dhe znj. Shmidauer u mirëpritën nga drejtoresha e Galerisë nacionale, Dita Starova Kerimi e cila i udhëhoqi nëpër hapësirat e kësaj galerie duke ua prezantuar rëndësinë dhe historinë e saj, kurse patën mundësi ta shikojnë edhe ekspozitën “Përvojë peizazhi” të artistëve Robert Jankullovski dhe Monika Moteska me të cilën e prezantuan vendin tonë në Bienalen e Venecias. Në Çifte hamam u mbaj edhe diskutimi në panel me temë “Gratë inspirojnë” ku fjalim mbajtën znj. Gjorgievska dhe znj. Shmidauer. Në këtë panel morën pjesë gra të suksesshme nga vendi, përfaqësuese nga fusha e politikës, ekonomisë, biznesit dhe sektorit qytetar, kulturës dhe nga fusha të tjera ku i prezantuan arritjet e tyre të deritanishme.
Gjatë vizitës në Qendrën memoriale të holokaustit të Hebrenjve nga Maqedonia, drejtori i kësaj qendre, Goran Sadikario i njohu me ekspozitën e përhershme në këtë Muze ku flitet mbi historinë e hebrenjve në shtetin tonë dhe në shtete të tjera gjatë periudhave të ndryshme nga e kaluara, mbi eksodin e tyre gjatë Luftës së Dytë Botërore dhe rithemelimit të bashkësisë hebraike në vendin tonë.
