Presidenti Stevo Pendarovski, sot në margjinat e edicionit të 5-të të Forumit paqësor të Parisit, u takua me Presidentin e Rumanisë, Klaus Johanis.
Në këtë takim u bisedua mbi marrëdhëniet e përgjithshme bilaterale midis Maqedonisë së Veriut dhe Rumanisë, që karakterizohen nga dialogu konstruktiv dhe i hapur politik, të bazuara në miqësi dhe respekt të ndërsjellë.
Të dy presidentët biseduan edhe për perspektivën evropiane dhe për aktualitetet në procesin e eurointegrimit maqedonas. Presidenti Pendarovski e falënderoi për mbështetjen rumune dhe theksoi se Maqedonia e Veriut mbetet e përkushtuar në rrugën evropiane dhe realizimin e qëllimit strategjik – anëtarësimi në Bashkimin Evropian.
Të dy presidentët biseduan edhe për ngjarjet në rajon në lidhje me invazionin rus mbi Ukrainën, si dhe ndikimin mbi fqinjësinë më të gjerë, ku theksuan se të dy shtetet, si anëtare në NATO, demonstrojnë unitet dhe bashkëpunim të ndërsjellë.
