Presidenti Stevo Pendarovski në Madrid në Samitin e NATO-s pati një takim të shkurtër me kryeministrin britanik Boris Xhonson.
Në këtë takim u bisedua mbi marrëdhëniet bilaterale midis dy qeverive, si dhe mbi ngjarjet aktuale dhe mbi sfidat e sigurisë lidhur me invazionin rus mbi Ukrainën.
Në lidhje me relacionet bilaterale, bashkëfolësit shprehën kënaqësinë nga zhvillimi i marrëdhënieve të përgjithshme të cilat i karakterizon miqësia e ndërsjellë, besimi reciprok dhe partneriteti i fuqishëm.
Presidenti tha se bashkëpunimi në mbrojtje me Britaninë është dinamik me mbështetje të përhershme britanike për Armatën tonë në ndërtimin e kapaciteteve ushtarake dhe interoperabilitetin me aleatët në NATO, kurse dëshmi për këtë është stërvitja që u mbajt para pak kohe në Krivollak ku morën pjesë 2500 ushtarë britanikë.
Presidenti Pendarovski shprehu falënderim për përkushtimin britanik në përparimin e sigurisë, stabilitetit dhe prosperitetit të rajonit të Ballkanit Perëndimor.
