Presidenti, Stevo Pendarovski, me rastin e 5 Nëntorit – Ditës Botërore të Gjuhës Rome, sot mori pjesë dhe mbajti fjalim në takimin virtual “5 Nëntori – Dita Botërore e Gjuhës Rome, nevoja për mbështetje institucionale për studimin, përdorimin dhe ruajtjen e gjuhës rome”.
Në takim, Presidenti Pendarovski përgëzoi komunitetin rom në Maqedonisë së Veriut me rastin e 5 Nëntorit – Ditës Botërore të Romëve, duke thënë se ruajtja e gjuhës amtare është një detyrim dhe një thesar i rëndësishëm për ekzistencën, kulturën dhe traditën e çdo kombi.
Nga këtu, Presidenti Pendarovski theksoi rëndësinë e mbështetjes institucionale për studimin, përdorimin dhe kultivimin e gjuhës rome, e cila është gjithashtu një kontribut për forcimin e shoqërisë multietnike të Maqedonisë së Veriut.
“Përpjekjet tuaja si arsimtarë dhe profesionistë që kontribuojnë në afirmimin e gjuhës rome në arsim janë thelbësore për të siguruar qasje të barabartë në arsim për të gjithë nxënësit pa përjashtim. Ne, politikanët, e kemi obligim t’ju dëgjojmë dhe së bashku me ju të propozojmë politika të përshtatshme “, tha Presidenti Pendarovski në fjalimin e tij.
Në këtë drejtim, Presidenti Pendarovski shprehu mbështetje të qartë për përpjekjet e arsimtarëve dhe të gjithë faktorëve të tjerë të komunitetit rom për ta bërë gjuhën rome të detyrueshme duke filluar nga klasa e parë, kultura rome të jetë një subjekt fakultativ për fëmijët jo romë, dhe mbështetjen për restaurimin e Katedrës së Gjuhës Rome.
Në frymën e multikulturalizmit, të gjitha komunitetet që jetojnë në Maqedoninë e Veriut duhet të kenë hapësirën e të shprehurit dhe krijimit të gjuhës së tyre amtare, theksoi Pendarovski. Në këtë mënyrë, avancimi i procesit të përgjithshëm arsimor të fëmijëve romë dhe sigurimi i kushteve të përshtatshme ka rëndësie esenciale për kultivimin e mëtejshëm të gjuhës rome.
Para pjesëmarrësve në takim, Presidenti tha se duke u mbështetur dhe respektuar parimin e mosdiskriminimit, barazisë dhe sundimit të së drejtës, çdo anëtar i komunitetit rom duhet të gëzojë mundësi dhe të drejta të barabarta, si parakusht për një jetë dinjitoze. Në këtë drejtim, vendi ynë do të vazhdojë të kontribuojë përmes përpjekjeve thelbësore në avancimin e cilësisë së jetës së komunitetit etnik rom.
