Presidenti i Republikës së Maqedonisë së Veriut, Stevo Pendarovski sot priti 11 vjeçarin Andi Ismaili nga Gostivari, Kampion botëror në vallëzim modern.
Në takimin ku morën pjesë edhe prindërit e tij, Andi i tregoi përshtypjet e tij nga pjesëmarrja në Kampionatin botëror ku në dhjetor të vitit të shkuar u mbajt në Osa të Polonisë. Në këtë garë botërore, Andi fitoi vendin e parë në kategorinë vallëzim modern- solo për fëmijë.
Presidenti Pendarovski theksoi që Andi edhe pse është vetëm 11 vjeç, ai tashmë është ambasador i vendit tonë sepse ka arritur ta promovojë Maqedoninë e Veriut përmes artit të vallëzimit të tij. Dhe për këtë, siç theksoi presidenti Pendarovski, persona të rinj e të talentuar, shteti duhet t’u japë mbështetje pa rezervë.
Andi i ri në takimin me presidentin Pendarovski njoftoi se sfida e tij e radhës është Kampionati evropian në xhaz, balet modern dhe klasik, që në qershor të këtij viti do të mbahet në Operën dhe Baletin Kombëtar në Shkup.
Gjithashtu, Andi Ismaili i talentuar është anëtar i studios së vallëzimit “I Dance” nga Gostivari. Për koreografinë me të cilën fitoi në Poloni, i kanë ndihmuar trajnerë dhe koreografë edhe nga studio “Break a leg” nga Shkupi.
