Presidenti i Republikës së Maqedonisë së Veriut dhe Komandanti Suprem i forcave të armatosura, Stevo Pendarovski, sot i vizitoi përfaqësuesit e batalionit për mbështetje ushtarake-mjekësore, në suazat e Qendrës Ushtarake-Mjekësore.
Pas shpalljes së pandemisë me virusin kovid-19, personeli i kësaj qendra u përfshi aktivisht në mbështetjen e të punësuarve në institucionet publike shëndetësore. Me kërkesë nga Ministria e Shëndetësisë në mars, një ekip i Qendrës Ushtarake-Mjekësore e vendosi spitalin për manovrim para sheshit të Klinikës Infektive në Qendrën Klinike “Nënë Tereza”, me qëllim që të zmadhohen kapacitetet në rast të valës së madhe të pacientëve me kovid-19.
Duke pasur parasysh numrin e madh të të sëmurëve nga ky virus, nga mesi i muajit të kaluar, personeli ushtarak-mjekësor i kësaj qendre është angazhuar në Qendrën e Shëndetit Publik dhe SPQ “8 Shtatori”. Komandantja e kësaj qendre, kolonelja Irena Mineva e informoi Presidentin Pendarovski se ekipi i cili është angazhuar për nevojat e SPQ “8 Shtatori” përbëhet nga teknikë mjekësorë me përvojë të cilët kanë punuar në ish-spitalin ushtarak. Ata janë shpërndarë menjëherë në repartin e kujdesit intensiv dhe në dhomën e reaminacionit, ku janë vendosur pacientët në gjendje me të rëndë të sëmurë me kovid-19.
Gjatë vizitës në Qendrën Ushtarake-Mjekësore, Presidenti Pendarovski nëpërmjet video-lidhjes bisedoi me rreshteren e klasës së parë Fatime Mustafovska, e cila është pjesë e ekipit e angazhuar në SPQ “8 Shtatori” dhe e cila deri në transformim të Spitalit Ushtarak, ka punuar në repartet kirurgjike. Duke theksuar se puna me pacientët e sëmurë rëndë është specifike, Presidenti Pendarovski i rekomandoi Mustafovskës të jetë e qëndrueshme.
“Na mbetet të besojmë se kriza me pandeminë e virusit kovid-19 do të përfundojë shumë shpejt dhe se punonjësit në shëndetësi, por edhe të gjithë që janë përfshirë në ballafaqimin me pasojat e kësaj pandemie do të mund të marrin frymë dhe të çlirohen nga stresi dhe nga rreziku i përditshëm” theksoi Presidenti Pendarovski në bisedën me Mustafovskën.
Përndryshe, për punën e qendrës, misionin e saj dhe planet e ardhshme, Presidentin Pendarovski e informoi komandantja e qendrës, kolonelja Irena Mineva. Në prezantimin e vet kolonelja Mineva theksoi se momentalisht po ballafaqohen me mungesë të doktorëve nga mjekësia e përgjithshme, të cilët janë përgjegjës për mbrojtjen primare shëndetësore të shëndetit të garnizoneve. Qendra Ushtarake-Mjekësore, siç tha kolonelja Mineva merr pjesë në sistemin e tërësishëm shëndetësor në vend, ka marrëveshje me Fondin e Sigurimit Shëndetësor dhe nëpërmjet sistemit “Termini im” u jep shërbime shëndetësore të gjithë qytetarëve.
Si vend anëtar në NATO, siç tha Presidenti Pendarovski, është e domosdoshme që Qendra Ushtarake-Mjekësore të jetë e ekipuar si duhet dhe si deri më tani të funksionojë në mënyrë të përkryer.
Misioni kryesor i kësaj qendre është ruajtja dhe përparimi i shëndetit dhe mbajtja e gatishmërisë luftarake të përfaqësuesve të Armatës maqedonase në nivelin e nevojshëm. Përveç misionit themelor, njësia është përgjegjëse për Spitalin tokësor manovrues me Rolin 2. Në vitin 2020 STM me Rolin 2 është vlerësuar sipas konceptit të NATO-s për vlerësim të shkathtësive operative dhe sipas të gjitha kritereve i mori notat më të larta. Gjithashtu, personeli i Qendrës Ushtarake-Mjekësore deri më tani ka marrë pjesë në shumë operacione paqësore, përkatësisht “ALTEA” në Sarajevë, Bosnjë dhe Hercegovinë, në misionet “ISAF” në Kabul dhe në Majmana, Republika Islame Afganistan.